Prishtinë, më 6 maj 2024
Kryetari i Bashkësisë Islame të Kosovës, Myftiu Naim ef. Tërnava, ka pritur sot në takim zëvendësministrin e Kulturës dhe Turizmit të Republikës së Turqisë, dr. Serdar Çam.
Gjatë këtij takimi, Myftiu Tërnava, e njohu mysafirin me aktivitetet dhe jetën fetare në Kosovë, e cila organizohet nga Bashkësia Islame e Kosovës. Në këtë takim, Myftiu Tërnava, falënderoi presidentin e Turqisë, Rexhep Taip Erdogan, Dijanetin e Turqisë, si dhe Drejtorinë e Vakëfeve për bashkëpunimin e shkëlqyer.
Myftiu Tërnava tha se me Drejtorinë e Vakëfeve, Bashkësia Islame e Kosovës ka një bashkëpunim të shkëlqyer, ku vetëm deri më tani janë finalizuar 14 projekte dhe 10 të tjera janë afër që të startojnë.
Në anën tjetër, zëvendësministri i Kulturës dhe Turizmit në Turqi, z. Serdar Çam, falënderoi Myftiun Tërnava për pritjen dhe bashkëpunimin e shkëlqyer që kanë. Ai tha se shteti turk dhe qeveria turke kanë një simpati të veçantë për Prishtinën, duke premtuar kështu përkushtimin e tyre për thellim të bashkëpunimit.
Po ashtu, ai gjatë këtij takimi tha se ruajtja e trashëgimisë fetare është e rëndësishme dhe për këtë arsye shteti i Turqisë dhe Drejtoria e Vakëfeve i kushton rëndësi të veçantë. Gjatë kësaj vizite, zëvendësministri turk, Myftiu Tërnava dhe mysafirë të shumtë morën pjesë në hapjen solemne të restaurimit të xhamisë “Alaudin” në Prishtinë.
