Sipas presidentit serb, tashmë jemi në një Luftë Botërore
Konflikti në Ukrainë në fakt tashmë është kthyer në një luftë botërore, tha presidenti serb Aleksandar Vuçiç, cituar nga Rusia Sot pro-Kremlinit.
Sipas RT, Vuçiç beson se Perëndimi po lufton kundër Rusisë përmes aleatëve të saj në Kiev.
“Ne duhet të kuptojmë se jemi në mes të një lufte botërore, pasi nuk ka më kuptim ta quajmë këtë konflikt rajonal. Domethënë, i gjithë Perëndimi po lufton kundër Rusisë përmes ukrainasve. Ky është një konflikt global,” tha Vuçiç.
Sipas tij, kjo luftë do të bëhet edhe më e rëndë dhe jehona e saj mund të ndihet edhe në Ballkan. Presidenti i Serbisë thekson se “do të bëjë gjithçka për të ruajtur paqen”.
Vuçiç beson gjithashtu se Rusia së shpejti do t’i afrohet Perëndimit me “disa propozime”, veçanërisht në kontekstin e avancimit të forcave ruse në Donbass.
“Unë e di se çfarë na pret. Sapo Putini të përfundojë punën e tij në Seversk, Bakmut dhe Soledar dhe të arrijë linjën Slavyansk-Kramatorsk-Avdivka, do të dalë me një propozim. Dhe nëse Perëndimi nuk e pranon atë, ferri na pret”, tha presidenti serb.
Kujtojmë se Serbia, siç bëri përpara pushtimit rus të Ukrainës, vazhdon të përpiqet të mbajë marrëdhënie të ngushta me Moskën, ndaj nuk iu bashkua valës së sanksioneve me të cilat reagoi pjesa tjetër e Evropës ndaj agresionit. /tesheshi.com/
