Në prag të manovrës më të madhe ushtarake të NATO-s në Ballkanin Perëndimor, të hënën në Shqipëri zbarkoi kontingjenti i fundit me rreth 800 ushtarë amerikanë që do të jenë pjesë e tij.
Lajmin e ka bërë të ditur ambasadorja amerikane në Shqipëri, Yuri Kim, e cila përmes llogarisë së saj në Twitter ka paralajmëruar edhe qëndrimin e disa gjeneralëve amerikanë në Shqipëri, gjatë muajit maj, për t’i mbikëqyrur ushtrimet e përbashkëta historike mes mijëra ushtarëve amerikanë dhe shqiptarë në Shqipëri.
Manovra e NATO-s “Defender 21”, që përbën njërin nga ushtrimet më të mëdha fushore amerikane në Evropë në 25 vjetët e fundit, ka filluar në fund të muajit mars dhe do te përmbyllet në muajin qershor përgjatë Ballkanit dhe rajonit të Detit të Zi, në pikat strategjike që lidhin Evropën, Azinë dhe Afrikën.
Në këtë manovër ushtarake marrin pjesë 28 mijë trupa të shteteve të Aleancës Veriatlatike nga 27 shtete pjesëmarrëse.
Pjesëmarrëse dhe njëkohësisht nikoqire e kësaj manovre që ka për qëllim përgjigjen e shpejt dhe të koordinuar ndaj një situatë krize, është edhe Shqipëria, e cila është anëtare e NATO-s që nga viti 2009.
Manovra e NATO-s “Defender 21” ndodh në kohën kur marrëdheniet mes NATO-s dhe Rusisë janë në kulm të acarimit.
Javëve të fundit, Rusia ka shtuar kërcënimet dhe praninë ushtarake në kufi me Ukrainën, duke hapur mundësinë e një intervenimi ushtarak rus në pjesën lindore të Ukrainës.
