Kombet e Bashkuara dhe Shtetet e Bashkuara kanë paralajmëruar se Siria është në prag të rrëshqitjes në luftë civile, pas masakrës së javës së kaluar në fshatin Houla.
Kreu i OKB-së, Ban Ki-mun, i ka bërë thirrje presidentit sirian, Bashar al-Asad, që të bëjë më shumë për të zbatuar planin për paqe të të dërguarit ndërkombëtar, Kofi Anan.
“Masakra e civilëve, si ajo e fundjavës së kaluar, mund ta zhysë Sirinë në një luftë katastrofale civile, nga e cila nuk do të mund të shërohej kurrë. I kërkoj Qeverisë siriane të angazhohet për planin për paqe të Ananit”, ka thënë Ban.
Sekretarja amerikane e Shtetit, Hillari Klinton, ka thënë se nëse Rusia vazhdon të mbështesë regjimin e Asadit në Këshillin e Sigurimit të OKB-së, vendi prapë mund të rrëshqasë në luftë civile.
Masakra në Houla ka ndodhur më 25 maj dhe në të kanë humbur jetën 108 persona – shumica nga ta gra dhe fëmijë.
Siria është përfshirë nga protestat antiqeveritare dhe dhuna qysh në mars të vitit të kaluar./rel/kohaislame
