Platforma sociale Facebook njoftoi se do të ndalojë përmbajtjet që reflektojnë “nacionalizmin e bardhë” dhe “separatizmin e bardhë”.
Përmes një njoftimi në Facebook, rrjeti social paralajmëroi ndalimin e postimeve, fotografive dhe përmbajtjeve të tjera që citojnë nacionalizmin e bardhë, supremacinë dhe separatizmin.
Masa e re, që do të fillojë të zbatohet nga java e ardhshme, do të vlejë edhe për platformën Instagram.
Vendimi vjen gati dy javë pas sulmit terrorist ndaj dy xhamive në Zelandë të Re gjatë namazit të xhumasë, ku 50 persona u vranë dhe 50 të tjerë u plagosën.
Sulmi i terroristit në Christchurch të Zelandës së Re u transmetua drejtpërdrejt në Facebook dhe u shpërnda në masë të madhe, ndërsa më pas u ndalua.
Facebook më herët ka qenë në shënjestër të kritikave për shkak të indiferencës ndaj postimeve të racistëve të bardhë.
