Manchester City është fitues i derbit të qytetit të Mançesterit, pasi në Etihad Stadium mposhti kampionin në fuqi, Manchester United, me rezultat 4-1.
Ekipi vendas dukej komod në shtëpi, edhe pse kishte për kundërshtar rivalin lokal dhe kampionin në fuqi.
Një krosim të Aleksandar Kolarov nga e majta e priti Sergio Aguero, i cili me vole shënoi golin e merituar të Cityt (16’).
Kur po përfundonte pjesa e parë (45’+1), pas një harkimi nga këndi të Nasrit, Negredo u tregua më i fuqishëm se Smalling e Vidic në ajër dhe topi shkoi te Yaya Toure, i cili e futi në portë.
Djajtë e Kuq nuk kaluan aspak mirë edhe në gjysmën e dytë, sepse rivalët e tyre nuk ndaleshin së shënuari.
Negredo u tregua i mrekullueshëm duke pranuar një pasim të Nasrit dhe duke asistuar te Sergio Aguero, ndërsa argjentinasi e përshëndeti për të dytën herën portierin De Gea (47’).
Jesus Navas vrapoi rreth 70 metra nga e djathta dhe krosoi në zonë, Samir Nasri ishte krejt i lirë për të fundosur mysafirët (50’).
Pa përfunduar takimi, Wayne Rooney realizoi golin e nderit për Unitedin (87’).
Manchester City ngritet në pozitën e tretë në tabelë me pikë të barabarta me Chelsean dhe Liverpoolin, ndërsa ka dy pikë më pak se liderët, Arsenal e Tottenham.
Në ndeshjen tjetër, Tottenham Hotspur ka fituar si mysafir i Cardiff Cityt me golin e Paulinhos të shënuar në fund të takimit (90’+3). /Telegrafi/kohaislame.com
