Ndodhet i ndaluar që prej një muaji në Kroaci, Ismail Morina, i njohur si “Ballist Morina”, protagonisti i mbrëmjes së nëntorit të vitit 2015 në Beograd, që nëpërmjet një droni të telekomanduar valëvite mbi stadiumin e Beogradit flamurin e Shqipërisë së Madhe.
Një akt që e shndërroi përfaqësuesen e Shqipërisë në objekt sulmi nga serbët, aq sa për të ndërprerë ndeshjen e për të fituar çështjen në CAS, duke hipotekuar 3 pikët me rëndësinë e kualifikimit në Europianin Francë 2016.
Sikurse raportohet nga disa burime, Morina i ndaluar në datën 10 qershor në kufirin mes Malit të Zi dhe Kroacisë, teksa po përpiqej të vijonte udhëtimin e tij ilegal drejt Italisë ku jeton, më datë 25 korrik ka dalë para gjykatës. Vendimi i Gjykatës së Dubrovnikut ka vendosur për ekstradimin e “Ballistit” drejt Serbisë, prej nga ku është lëshuar edhe urdhri i arrestit ndërkombëtar, për veprën e Ismail Morinës, aq të bujshme e të shndërruar dhe në shumë mediatike e po aq politike.
Familjarët e Morinës kanë kërkuar në mënyrë të vazhduar mbështetje nga institucionet shqiptare, që nga momenti kur “Heroi” i Beogradit është ndaluar muajin e kaluar, por vendimi i Gjykatës së Dubrovnikut është dëshmia më e mirë e faktit që përpjekjet e shtetit Shqiptar, nëse kanë ekzistuar, kanë qenë të pamjaftueshme për të evituar dorëzimin e “Ballistit” në duart e Serbisë. /telesport/
