Forca e NATO-s: Patrullime të përbashkëta dhe me forca serbe
Forcat paqeruajtëse ndërkombëtare në Kosovë të udhëhequra nga NATO (KFOR) kanë lëshuar një deklaratë zyrtare lidhur me ngjarjet më aktuale në Kosovë dhe situatën e sigurisë, të shkaktuar nga bllokada e institucioneve paralele serbe në veri të vendit.
Zyrtarët e KFOR-it e përshkruan situatën e sigurisë në vend si të qetë, por të brishtë, veçanërisht në veri, zonë e populluar kryesisht nga serbët. Përveç patrullave të pavarura, ata deklaruan patrullime të përbashkëta me Policinë e Kosovës, si dhe patrullime me Forcat e Armatosura të Serbisë përgjatë vijës kufitare, për të garantuar sigurinë.
Krahas veriut, KFOR-i javëve të fundit ka paralajmëruar patrullime edhe në qytete të tjera.
“Ne e zbatojmë mandatin tonë të OKB-së në çdo kohë dhe në mënyrë të paanshme, përmes aktiviteteve të ndryshme. Këtu përfshihen patrullimet e rregullta, të cilat kryhen në formate të ndryshme, si patrulla të pavarura të KFOR-it në të gjithë Kosovën dhe përgjatë vijës kufitare, patrullimet e përbashkëta me Policinë e Kosovës dhe patrullimet e sinkronizuara, paralelisht me forcat e armatosura serbe në anët përkatëse të vijave kufitare”, bëhet e ditur nga Zyra për Informim e KFOR-it.
Në deklaratat e publikuara së fundi, thuhet se pjesëtarët e KFOR-it kanë kryer patrullime përgjatë vijës kufitare në Prishtinë dhe Lindje, me qëllim të konsolidimit të stabilitetit rajonal.
KFOR-i shtoi se këto patrulla, si dhe angazhimet me të gjitha komunitetet lokale, përfaqësojnë “një demonstrim konkret dhe të dukshëm të përkushtimit afatgjatë dhe të palëkundur të NATO-s për siguri të qëndrueshme në të gjithë Kosovën dhe stabilitet në të gjithë Ballkanin Perëndimor”.
“KFOR-i vazhdon të monitorojë nga afër situatën. Ne kemi një prani të dukshme, fleksibël dhe të përgjegjshme që na lejon të adresojmë në mënyrë efektive çdo zhvillim të rëndësishëm të sigurisë, në përputhje me mandatin tonë të OKB-së”, thuhet në përgjigje.
I pyetur për gjendjen e sigurisë pas paralajmërimeve të Qeverisë për hapjen e urës mbi lumin Ibër, KFOR-i tha se situata është e qetë, por e brishtë.
“Në përgjithësi situata e sigurisë në Kosovë është e qetë, por ende është e brishtë, sidomos në veri të Kosovës. Ne po ndjekim nga afër zhvillimin e ngjarjeve dhe mbajmë një prani të dukshme dhe të përshtatshme përmes patrullimeve të rregullta dhe angazhimit me komunitetet lokale”, shtuan ata.
KFOR-i shtoi se ata vazhdojnë të operojnë në Kosovë si përgjegjës i tretë, pas Policisë së Kosovës dhe EULEX-it.
“Ne vazhdojmë të përmbushim mandatin tonë të OKB-së – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis paqësor dhe të sigurt për të gjithë njerëzit dhe komunitetet që jetojnë në Kosovë, në çdo kohë dhe në mënyrë të paanshme”, përfunduan ata. /tesheshi.com
