Prej tetorit të vitit 2013, një kompani e huaj ka qenë në kontakt të vazhdueshëm me disa zyrtarë shqiptarë të interesuar për të blerë prej saj programe kompjuterike të afta për të përgjuar kompjuterë dhe telefona të gjeneratës së fundit.
Programi i quajtur Remote Control System Galileo është projektuar për të sulmuar, infektuar dhe monitoruar një numër tepër të madh kompjuterësh dhe smartphone vjedhurazi. Ai i lejon përdoruesit që të mbledhë fshehurazi të dhëna nga të gjitha sistemet operative të përdorura, si Windoës XP, Vista, Windows 7 dhe 8, Mac OS dhe Linux. Në lidhje me smartphone ai mund të monitorojë dhe përgjojë po ashtu të gjitha sistemet: iOS iPhone, Symbian që përdor Nokia, Blackberry, Adroid-ët dhe Windows 8.
Pasi objektivi është infektuar nga ky program, Remote System Control Galileo lejon hyrjen në aparat dhe marrjen e informacioneve të shumëllojshme. Këtu përfshihen të dhënat dhe komunikimet nga Skype, Facebook, Twitter, WhatsApp, Viber, Line etj. Programi përgjon gjithashtu në të gjitha gjuhët e tastierave kompjuterike apo të telefonave, zbulon vendndodhjen e tyre, u kopjon fotografitë, mikrofonat, pra bisedat dhe kamerat. Në mënyrë të padukshme ky program arrin të depërtojë edhe sistemet e mbrojtëse më të njohura.
Wikileaks ka zbuluar sy program iu propozua Shërbimit Informativ Shtetëror. Mësohet se propozimi erdhi nga një drejtori brenda SHISH. Por, siç tregon Wikileaks, bisedimet kishin nisur më herët.
Kontaktet mes kompanisë Hacking Team, që e dispononte atë kishin nisur prej tetorit të vitit 2013 mes drejtuesve të saj dhe një zyrtari shqiptar me inicialet E.D. Negociatat vijojnë mes E.D dhe përfaqësuesve të kompanisë. Por, në dhjetor të 2013-ës pjesë e tyre bëhet edhe një punonjës i shërbimit informativ me inicialet E.L. Në këmbimin e e-maileve mes tij dhe një përfaqësuesi të HackinTeam, punonjësi i SHISH thotë se Shërbimi Informativ kishte pranuar parimisht që të shihte një prezantim të programit, në fillim të vitit 2014. Disa përfaqësues të kompanisë mbërrijnë në Tiranë në shkurt të vitit 2014 për ta prezantuar projektin.
E-mailet e Wikileaks japin detaje për udhëtimin e përfaqësuesve të kompanisë, akomodimin e tyre në Hotel Tirana dhe largimin nga Shqipëria. Ato tregojnë gjithashtu se mes kompanisë dhe pikave të kontaktit në Shqipëri ka pasur edhe telefonata. Përmbajtja e tyre nuk bëhet e ditur.
TV Klan mësoi se pas shumë muajsh negociata, të cilat vijuan edhe në vitin 2015, SHISH refuzoi ta blinte super-programin e përgjimeve. Arsyeja: ai ishte i kushtueshëm dhe SHISH nuk mund ta përballonte. Në dokumentet e publikuar nga Wikileaks thuhet se të interesuar për këtë program ishin zyrtarë të Qeverisë. Por në e-mailet e siguruar deri tani nuk ka shumë detaje rreth kësaj.
Nuk është e qartë nëse negociata do të vijojnë me kushte të tjera që mund të kërkojnë ulje të çmimit. Nëse programi do të blihej, asnjë nga kompjuterët apo celularët nuk do të ishte më i sigurt.kohaislame
