Eksperti palestinez për vendbanimet hebraike, Khalil Tufakji, beson se plani i paqes në SHBA parashikon një shtet të izoluar palestinez dhe pothuajse shndërron Bregun Perëndimor në një burg të madh.
Tufakji, një ish-drejtues i Shoqatës Hartografike, i cili u burgos nga Izraeli, komentoi të ashtuquajturën “Marrëveshje Shekulli” të Trump, duke thënë se sipas planit të Presidentit amerikan, territori palestinez do të rrethohej nga vendbanimet hebraike dhe rrugët që u përkasin atyre.
“Izraeli dëshiron t’i kthejë pronarët e vërtetë të kësaj toke nga Jeruzalemi dhe Palestina, në një pakicë,” tha Tufakji.
Ai shtoi se vendet fetare do të ishin nën kontrollin e Izraelit.
“Kur të dojë Izraeli, do t’i lejojë ata të hyjnë ose jo. Kështu, fakti që, sipas vendimeve ndërkombëtare, Jeruzalemi Lindor do të jetë kryeqyteti i Palestinës, do të avullojë”, tha Tufakji.
Ai shtoi se plani parashikon që kryeqyteti i shtetit palestinez të mos jetë Jeruzalemi, por zona në periferi të Jeruzalemit, e cila aktualisht është shtëpia e kampit të refugjatëve Shu’fat.
Tufakji tha se, sipas planit, rajoni Agwar, i njohur si qendra bujqësore dhe zona që përbën 27 përqind të Bregut Perëndimor, do të jetë nën kontrollin e Izraelit.
Ai shtoi se kjo do të parandalonte përparimin ekonomik të Palestinës.
“Ne po themi se plani synon që ta vendosë ekonominë palestineze nën kontrollin e Izraelit. Izraeli do të ketë kontroll mbi burimet e ujit, gurit dhe mermerit, si dhe furnizimet ushqimore palestineze,” tha Tufakji.
Ai shtoi se Izraeli ka kohë që ka kërkuar të aneksojë Bregun Perëndimor në territorin e tij.
“Izraeli udhëhiqet nga një axhendë shumë e qartë. Të djathtët, të majtët ose mbështetësit e ndonjë ideje tjetër, pajtohen për dy gjëra: E para është formimi i një shteti palestinez në Jordan dhe e dyta ajo që Jeruzalemi është kryeqyteti i vetëm një shteti hebre”, tha Tufakji.
Ai shtoi se plani i paqes do ta kthejë Bregun Perëndimor në një burg të madh të rrethuar nga Izraeli.
“Neve na është kërkuar që t’ia dorëzojmë çelësat e Bregut Perëndimor Izraelit dhe të heqim dorë nga të drejtat historike, sociale dhe kulturore,” tha Tufakji.
Ai shtoi se Izraeli dëshiron një “shtet plotësisht hebre”.
“Në përputhje me këtë qëllim, do t’i detyrojë palestinezët të migrojnë nga territori ku ata jetojnë,” përfundoi Tufakji. /tesheshi.com/
