12.2 C
Pristina
Friday, March 29, 2024

Vuçiq i përgjigjet Kadri Veselit, në Nish mund të vish vetëm si turist

Më të lexuarat

Presidenti i Serbisë, Aleksandar Vuçiq, po mban në këto çaste konferencë për media lidhur me vrasjen e Oliver Ivanoviqit mëngjesin e sotëm në Veri të Mitrovicës.

Vuçiqi ka shfrytëzuar rastin që në këtë konferencë t’i kundërpërgjigjet Kadri Veselit rreth deklaratës së tij se “nëse Serbia i kthehet sërish Kosovës, nuk ndalemi deri në Nish”.
Presidenti serb ka thirrur konferencë për media pas zhvillimeve të 24 orëve të fundit. Fillimisht ai ka komentuar deklaratën e kreu të Kuvendit të Kosovës, Kadri Veseli, i cili dje në Reçak tha se ‘nëse kthehet Serbia në Kosovë, nuk ndalemi deri në Nish’.

Vuçiq e ka quajtur Veselin “Zoti i Kosovës”, ndërsa thotë se ai në Nish mund të shkojë vetëm si turist.

“Është çmenduri të negociosh në këtë pikë, kur ka kërcënime çdo ditë në Kosovë. Veseli ka thënë se shqiptarët nuk do të ndalen deri në Nish dhe ne i kemi kuptuar mirë këto kërcënime, si dhe heshtjen e atyre që është dashur të reagojnë në sekondë”, ka thënë Vuçiqi.

Ai, po ashtu, pati edhe një mesazh për kryeparlamentarin Veseli.

“Mesazhi ynë për Veselin është se ai nuk do të vijë deri në Nish dhe këtë qytet ai mund ta vizitojë vetëm si turist”, ka shtuar ai.

Presidenti serb foli për vrasjen e liderit të iniciativës “Liri, Demokraci, Drejtësi”, duke thënë se do të kërkojë që në hetimet për vrasjen të përfshihet edhe Serbia.

Ndryshe, menjëherë pas vrasjes së Ivanoviqit, Serbia ndërpreu bisedimet me Kosovën në Bruksel, ku po qëndrojnë ekipet e të dyja palëve.

Mëngjesin e sotëm, Ivanoviq po shkonte në zyrën e tij, kur u sulmua nga një makinë në lëvizje. Ishin katër plumba fatalë për kreun e iniciativës qytetare SDP në Veri.

Derisa po transportohej për në spital, Ivanoviq nuk arriti t’u mbijetojë plagëve të marra. Në sallën e operacionit ai u fut pa shenja jete.

Deri më tani nuk ka asnjë të dyshuar rreth vrasjes së tij, ndërsa në Veri të Mitrovicës është gjetur një veturë, që dyshohet të ketë qenë e dorasit.

- Advertisement -spot_img

Më tepër

Të fundit