Dy shpërthime u regjistruan gjatë natës, një në Shkodër ndërsa tjetrit në Fushë Krujë. Policia e Shkodrës bëri me dije se rreth orës 23.55, persona ende të paidentifikuar, kanë hedhur lëndë plasëse, brenda oborrit, në afërsi të portës së shtetasit N. Lekaj, vjeç 41, banues në lagjen “Tre Herojt”, Shkodër, me detyrë punojë në administratën e Komunës Shllak (ndihmës financier).
Me të marrë këtë información nga Drejtoria e Policisë së Qarkut Shkodër, është organizuar puna dhe është ngritur grupi hetimor, të cilët mbërritën menjëherë në vendngjarje. Nga veprimet hetimore të kryera, u konstatua se si rezultat i shpërthimit të lëndës plasëse, janë dëmtuar xhamat e krahut të djathtë të automjetit Renxh Rover me targe AA 644 BY si dhe xhami i parë dhe xhami i pasmë i automjetit të markës Benz Mercedes me targe AA 810 AA, në pronësi të shtetasit N. Lekaj, të cilat ishin parkuar në oborrin e banesës, raporton Starti.
Nga ana e shërbimeve policore po punohet intensivisht për identifikimin e kapjen e autorëve, si dhe motivin e kësaj ngjarje. U kryen të gjitha veprimet e duhura procedurale e hetimore dhe materialet iu kaluan, për ndjekje të mëtejshme Prokurorisë së Rrethit Gjyqësor Shkodër, për veprën penale “Shkatërrimit të pronës me eksplozivë”.
Ndërkohë, një tjetër shpërthim u regjistrua në Fushë Krujë, rreth 200 metra larg rajonit të policisë. Eksplozivi është vendosur në një godinë të lojërave të fatit, e cila ndodhet në katin e parë të një pallati. Nga shpërthimi është shkatërruar plotësisht një gjenerator që furnizonte me energji pallatin, por nuk ka pasur të lënduar në njerëz.
Edhe në këtë rast, persona janë ende të paidentifikuar nga policia. Skuadrat e hetimit shkuan në vendin e ngjarjes ku nisën hetimet për të zbuluar rrethanat. Për rastin, janë shoqëruar disa persona, por ende nuk ka të dyshuar kryesor. Zona e Fushë Krujës ka regjistruar shpesh shpërthime eksplozivi. /Telegrafi/kohaislame
