Mbulimi i trupit në përgjithësi, dhe mbulesa e femrave në veçanti, është një çështje e përmendur dhe e trajtuar në të gjithë librat e shenjtë, dhe në Kur’anin famëlartë. Kur flitet për mbulimin e trupit, dhe më konkretisht se cila pjesë e trupit duhet mbuluar, në përgjithësi trajtohet caku minimal, e jo ai maksimal. Që do të thotë, në këndvështrimin islam, se femrës muslimane, sipas mendimit të shumicës së dijetarëve, i lejohet të zbulojë fytyrën dhe duart deri te kyçet, por nëse ajo vendos t’i mbulojë edhe këto dy pjesë të trupit, është në lirinë dhe të drejtën e saj që të mbulohet, e askush nuk ka të drejtë ta detyrojë të zbulojë jashtë vullnetit një pjesë të trupit. I vetmi rast ku mund të detyrohet femra ta zbulojë fytyrën është para gjykatësit, për t’u identifikuar.
Mbulimi tërësisht i trupit të femrës është një traditë njerëzore edhe paraislame, e vazhdon të jetë si tek muslimanët dhe tek të krishterët, madje edhe tek hebrenjtë. Edhe sot ka femra, si të krishtera, si hebreje, në vende të ndryshme të globit që e zbatojnë mbulimin e të gjithë trupit. Në shoqëritë europiane dhe në Shqipërinë e para një shekulli ky ka qenë po ashtu një fenomen i përhapur masivisht, dhe asnjëherë, dhe në asnjë rrethanë, nuk është konstatuar se mbulimi i trupit të femrës ka patur efekte negative në mjedisin shoqëror, apo, siç pretendon, Mustafa Nano, se mbulimi i tërë trupit mund të prodhojë në shoqëri fantazma apo individë që të fshihen pas mbulesës për të kryer veprime jonormale.Shoqëria njerëzore ka patur gra të mbuluara, nikab, dhe do të vazhdojë të ketë, pavarësisht “njeriut të ri”, produkt i sistemit komunist, i cili besonte se origjinën e ka nga majmuni dhe se kur të vdiste do të shndërrohej veç në pleh, në dhé! Njeri të cilin mund ta personifikojë si tipologji z. Nano e të ngjashmit me të, që parimet dhe botëkuptimet e tyre i ndërtojnë duke parë me lupën e ateistit. Këta individë i japin të drejtë vetes që t’ua diktojnë jetën vetjake dhe të tjerëve; për ta, të gjithë njerëzit “duhet të jenë njësoj, të vishen njësoj, të hanë njësoj”, siç ju pëlqen këtyre, përndryshe janë të prapambetur. Për më tepër, arrijnë gjer aty saqë dhe një femre e cila pohon se është mbuluar me vullnetin e saj ia kundërshtojnë këtë: “Vullnetin tënd e dimë ne, nuk e di ti!”Këta i thonë se fytyra, apo surrati, siç parapëlqen të shprehet z. Nano, nuk është vetëm i saj, por se në të kanë pjesë dhe ata. Duart nuk janë të tuat, por aty kemi pjesë dhe ne! E nëse një femër vendos ta mbulojë fytyrën e vet, duhet t’u bëjë një kërkesë z. Nano e të ngjashmëve me të për t’u marrë leje; e dëshpëruar nga përgjigjja negative e tyre, do detyrohet ta zbulojë sërish fytyrën!!!Unë jam i bindur se Mustafa Nano dhe shokët e tij nuk mjaftohen vetëm me heqjen e burkës. Dëshira dhe vullneti i tyre mbi veshjen e një femre i tejkalon edhe këto caqe.Tani po i drejtohem drejtpërdrejt z. Nano. I nderuar Mustafa! Duhet ta dish se shoqëria njerëzore është e larmishme, se çdo popull ka traditat dhe zakonet e tij, ku bën pjesë dhe kodi i veshjes. Logjika e unifikimit të gjërave në rrafsh global nuk mund të funksionojë. Karta e të drejtave të njeriut nuk mund t’i marrë seriozisht sugjerimet e tua, të një ateisti të vonshëm, siç e ke me shumë qejf të identifikohesh.Ka dekada që mbulimi i trupit të femrës është parë në mënyrë abuzive si burim i prapambetjes së një shoqërie, dhe se zbulimi i trupit të femrës është tregues i zhvillimit të saj. Kodi i veshjes ka rëndësinë e tij në çdo shoqëri, por assesi nuk mund të jetë barometri i zhvillimit apo i degradimit të shoqërisë. Ju duhet të bindeni se bota është më e madhe se ai cepi apo këndi ku jeni ulur e nga po shihni me lupë të prishur.Shpresoj që t’i hiqni syzet e ateistit dhe të shikoni mrekullinë e Krijuesit të gjithësisë në mozaikun e mrekullueshëm të globit, ku çdo traditë, çdo vlerë, çdo kod veshjeje, është një gur i çmuar. Të shihni mozaikun ku dhe femra e mbuluar tërësisht apo me shami është xhevahir i tij!
