15.9 C
Pristina
Thursday, March 28, 2024

“Qepe.., ikëm prej jush”, mjekja hedh poshtë propagandën e Pandeli Majkos

Më të lexuarat

Një mjeke e re shqiptare, e suksesshme dhe që po bën karrierë në Gjermani, ka refuzuar propagandën e qeverisë, me një shenim mbresëlënës në faqen e saj në Facebook. Mjekja Jana Nano, ishte përmendur nga Ministri i Diasporës, si një shembull e arritjeve të shqiptarëve ne botë. Majko e publikoi rastin e saj në faqen e tij, tre ditë më parë.

Por, ka reaguar Nano. Ajo niset së pari nga shkelja e privatësisë, sepse nuk i është marrë leje për ta bërë këtë publikim. Dhe pastaj ka denoncuar, atë që e quan hipokrizi, dhe pafytyrësi, pasi ajo dhe shumë të tjerë të kualifikuar, po e lënë Shqipërinë për shkak se sistemi është kalbur, dhe nuk u ofrohen mundësi e garanci nga qeveria. “Mbylleni gojën”, thotë Jana, kur promovoni njerëz që u larguan prej politikave tuaja.

Lexoni përgjigjen e plotë, një mesazh i vecantë dhe emocionues i mjekes së re.

Thjesht rastësisht, në fakt nga urimet e miqve, vura re që në profilin e Ministrisë së Diasporës, ndër shumë profileve promovimi shqiptarësh në botë, ndodhej edhe imi (me një foto).

Ky akt është bërë totalisht pa marrë asnjë lloj aprovimi nga ana ime. Përvec shfryrjes së momentit sesi një faqe zyrtare e shtetit nuk njeh konceptet bazë të privatësisë individuale dhe nuk denjon as të dërgojë një mesazh aprovimi, një ulërimë e brendshme, e papërkufizueshme që më zgjati gjatë gjithë mbasdites më detyroi të ndaj me ju këto rreshta.

Kam rreth 8 vjet që kam ikur nga Shqipëria. Në atë kohë (studente në vitin e fundit të mjekësisë), kisha një entuziazem dhe kuriozitet të përjetoja sa më shumë alternativa të tjera organizimi (më së shumti ne kontekstin e arsimit, se ai ka qenë aktiviteti im kryesor), larg botës ku isha rrethuar. Në atë kohë, në statusin e studentit, ishim përpjekur të artikuloheshim kundër fillesave të kalbëzimit të sistemit. Por me një përqasje tmerrsisht naive, pa kuptuar sa të thella i paska patur rrënjët gangrena e arsimit shqiptar. Sot, nga skandalet e herëpashershme, protestat e studentëve, emigrimi masiv i të kualifikuarve, kuptoj që vendi ka ecur veç mbrapsht!

Ky është një zhgënjim i thellë dhe i trishtë!Në këtë kontekst, kjo strategjia e Ministrisë së Diasporës me promovimin e “Shqiptarëve në botë’, me duket e dyfytyrë dhe e cekët!

E dyfytyrë, sepse shumë prej këtyre njerezve u larguan pasi nuk patën mundësi tjetër për të patur një jetë të denjë dhe të sigurtë. U larguan pasi vendi i tyre nuk ishte një opsion! Vendi i tyre nuk u dha as edhe një mundësi për të shprehur veten. Është shumë normale që njerëzit të lëvizin përgjatë jetës së tyre për të bërë eksperienca të reja pune a për të shijuar kultura të ndryshme jetese. Por ka një ndryshim të madh kur e bën këtë, sepse vendi yt nuk të siguron nevojat bazike të nje jete normale. Situata aktuale e Shqipërisë është reflektim i drejtpërdrejtë i politikave keqmenaxhuese dhe paaftesisë së drejtuesve.

E cekët, sepse aktivizon dhe stimulon ndjenjat demotivuese tek njerëzit, duke i bërë të mendojnë që andej jashtë Shqipërisë, është toka e premtuar. Të vendosesh si i huaj në një vend të ri ka vështirësite e veta. Nuk ke problemet primitive si në Shqiperi, por forma të tjera si p.sh. duhet të punosh shumë për të fituar besimin e njerëzve, kërkon kohë të krijosh komunitetin tënd të njerëzve ku mund të mbështetesh pasi je totalisht vetëm, diferencat kulturore ose gjuha etj, gjëra që në vendin tënd i merr të mirqena. Të kërkohet të të rregjet lëkura, me pak fjale! Përse gjithe këtë energji te mos e japësh në vendin tend? He pra, pse nuk krijoni kushtet që këta të rinj e të reja të lulëzojne në vendin e tyre e jo gjetkë?

Prandaj, shut the f*** up!!!, kur promovoni njerëz, të cilët u larguan prej politikave tuaja të këqija! Ndihem e turpëruar për ju, që në padyfytyrësinë tuaj, krenoheni për një punë që nuk dhatë asnjë kontribut. Përkundrazi, vendi im është sot edhe me keq seç e kam lënë! Ju jeni arsyeja kryesore pse shqiptarët sot ndihen të palumtur në vendin e tyre dhe ndërmarrin kalvarin e mundimeve të pafundme të “kurbetit” me fëmijët backpak në shpatulla!

Të vetmet që duhen të ndihen krenarë janë Shqiptarët, të cilët kontribuan nga njera anë me gjenet luftarake, e nga ana tjetër, me sakrificat e djersën e familjeve, me zemrat e copëtuara ndër kontinente!

Çfarë tha Pandeli Majko:

Dr. Jana Nano është mjekja e suksesshme shqiptare e specializuar për sëmundjet diabetike. Ajo është pjesë e grupit kërkues “Epidemiologjia e Diabetit” pranë Institutit të Epidemiologjisë në Helmholtz Zentrum München në Gjermani, ku studion identifikimin e përcaktuesve të diabetit dhe sëmundjeve të tjera kronike që lidhen me të. Më parë Nano ka qenë studiuese e jashtme në Departamentin e Epidemiologjisë në Shkollën e Shëndetit Publik në Harvard, Boston, SHBA.

- Advertisement -spot_img

Më tepër

Të fundit