Gjatë 24 orëve të fundit qytetin e Mosulit e kanë braktisur më shumë se 12.000 persona, bëhet e ditur nga Ministria e Migracionit të Irakut, raporton AA.
Civilët braktisin shtëpitë duke ikur nga sulmet e organizatës terroriste ISIS.
“Gjatë 24 orëve të fundit pjesët perëndimore të Mosulit, ku po vazhdon operacionet kundër ISIS-it, i kanë braktisur 12.458 persona”, theksuan nga Ministria.
Civilët strehë gjetën në kampet e pistës së aeroportit Kayyara si dhe në kampet e rajonit Erbil.
Që nga fillimi i operacionit për çlirimin e Mosulit, shtëpitë i kanë braktisur 89.245 persona.
Terroristët e ISIS-it nga vera e vitit 2014 kontrollojnë qytetin e dytë më të madh irakian të Mosulit.
Pas tre muajve të operacionit forcat e bashkuara irakiane me mbështetje të koalicionit ndërkombëtar në janar çliruan pjesën lindore të Mosulit, ndërsa më 19 shkurt filloi edhe aksioni për çlirimin e qendrës së qytetit që gjendet në brigjet perëndimore të lumit Tigër.