Mediat e huaja parashikojnë Lëvizjen BESA në qeverinë e pas 11 dhjetorit

0
681

Maqedonia përfundon këtë të premte fushatën zgjedhore, për t’iu drejtuar të dielën kutive të votimit. 11 dhjetori erdhi pas anullimit të dy datave në pranverë, ku kriza politike, e cila pasoi dhe një bojkot të pazakontë nga ana e opozitës,e shtyu votimin e paralajmëruar për tani në dhjetor.

 

Këto do jenë zgjedhje përcaktuese për të ardhmen e vendit pas një krize ndër më të rëndat gjatë 25 viteve, e po ashtu më e rënda që pas përfundimit të luftës. Ndërsa opozita maqedonase e kryesuar nga LSDM-ja me në krye Zoran Zaevin akuzon qeverisjen e VMRO-së dhe Gruevksin, liderin e saj, për një stil drejtimi të vendit plot abuzime, korrupsion dhe izolacion ndërkombëtar, nxitur dhe nga prirje të forta nacionaliste, me efekt bllokimin e procesit të integrimit europian, në anën tjetër opozita shqiptare akuzon BDI-në, partinë e Ali Ahmetit dhe këtë të fundit vetë, si shkaktarje të një situate të rënduar për shqiptarët. Sipas saj, në aleancë me Gruevksin, BDI po mban në pushtet një qeverisje anti-shqiptare; dhe për këtë përmendin, veç të tjerash, edhe procese të montuara si “Mostra”, “Sopoti” apo “Lagja e Trimave”.

Goditjen më të rëndë pushteti i dyshes Gruevksi – Ahmeti e ka marrë nga “bombat” e Zaevit, një aferë përgjimesh zyrtarësh me pushtet, prej të cilave është shfaqur ana e errët e qeverisjes VMRO-BDI.

Sakaq, zëri më i fuqishëm opozitar i kësaj fushate zgjedhore ka qenë risia politike me emrin BESA. Ajo konsiderohet si favoritja kryesore për ta mposhtur BDI-në, shumë më tepër se rivali i saj tradicional, PDSH e Menduh Thaçit.

Prestigjiozja austriake Der Standard, në një shkrim të saj kushtuar zgjedhjeve në Maqedoni, ka parashikuar një humbje të dyshes Gruevski – Ahmeti dhe ardhjen në drejtimin e vendit  të  LSDM-së, e që kjo e fundit mund t’i drejtohet BESËS për aleancë qeverisës.

Meqënëse BDI ka qenë pjesë e regjimit të korruptuar, shumë shqiptarë kanë humbur besimin te partia e Ali Ahmetit, me ç’rast janë krijuar disa parti të reja shqiptare, ku më e fuqishmja prej tyre mban emrin BESA. Ndikimi i saj vërehet veçanërisht në Shkup dhe Kumanovë, dhe nuk përjashtohet mundësia që ajo të jetë në koalicion me LSDM e Zoran Zaevit”, shkruhet nga Der Standard . /tesheshi.com/