Korrupsion në Maqedoni po merr përmasa të një epidemie. Kështu kanë thënë nga Lëvizja BESA, pas Raportit të Transparency International në të cilën thuhet se Maqedonia për sa I pëërket korrupsionit radhitet në vendin e 90-të, në listën e 176 vendeve në botë.
“Kështu edhe një herë po dëshmohet se mungon vullneti për luftimin dhe parandalimin e korrupsionit dhe akoma përballemi me ndërhyrje politike në gjyqësor dhe ndërhyrje të pajustifikuara në operacionet dhe proceset vendimmarrëse ditore të anti-korrupsionit dhe organeve gjyqësore. Po ashtu vlen të përmendet edhe fakti i hidhur se mediet dhe sektori civil vazhdojnë t’i vuajnë nga presionet e drejtpërdrejta, vazhdon trendi i keqpërdorimit të pushtetit ose i partive politike për financim të medieve pro-qeveritare, si dhe përdorim i inspektimeve tatimore për hakmarrje politike, kanë thënë nga Lëvizja BESA.
Një fakt tjetër shqetësues sipas këtij raporti, thonë nga Lëvizja BESA, është se rritja e korrupsionit dhe populizmi ose patriotizmi i rrejshëm, fenomen ky shumë prezent në shoqërinë tonë, janë të lidhura shumë ngushtë dhe janë në korrelacion me njëra-tjetrën.
“Lëvizja BESA angazhohet për një bashkëpunim më të ngushtë ndërmjet gjyqësorit, Komisionit Shtetëror për Parandalimin e Korrupsionit dhe Prokurorisë për Krimin e Organizuar. Ne jemi thellë të bindur se eliminimi i kapjes, departizimi dhe demokratizimi i shoqërisë janë parakushte elementare për një të ardhme evropiane të vendit”, thuhet në reagimin e BESËS.
Në indeksin për vitin 2015 Maqedonia ka qenë në pozitën e 66, në vitin 2014 në pozitën e 64 ndërsa në vitin 2013 TI e ka radhitur në pozitën e 67.
