Trajneri i Përfaqësueses së Kosovës në xhudo, Driton Kuka, së bashku me xhudistin e njohur Majlinda Kelmendi, kanë takuar sot avokat e njohur Arianit Koci.
Takimi ka të bëjë me keqpërdorimin e emrit të fitueses së medaljes së artë olimpike, Majlinda Kelmendi, nëpër rrjetet sociale.
“Me avokatin Arianit Koci për keqpërdorimet e emrit të Majlindës nëpër rrjete sociale! Së shpejti do ketë rezultate në këtë drejtim!”, ka shkruar Kuka në facebook.
Kjo po ndodh pas në javën e shkuar, një faqe në facebook në emrin e Majlinda Kelmendit kishte bërë postime në lidhje se “Majlinda Kelmendit i është kërkuar që të mposhtet nga xhudiste serbe”.
Kështu u raportua të ketë thënë Majlinda Kelmendi, duke iu referuar një faqeje në Facebook në emër të kampiones sonë olimpike.
Për këtë lajm që bërë bujë në shumë media vendore kishte reaguar edhe trajneri i saj Kuka.
“Majlinda s’ka Facebook, as Instagram as asnjë rrjet tjetër social! Miq të nderuar, media por edhe organet e policisë për krime kibernetike mundësisht të parandalohen matrapazët e mashtruesit me emër të Majlindës! Ju lutem që ky status të publikohet dhe të luftohet kjo dukuri në emër të Kampiones tonë!!!”.
“Mediat sidomos elektronike të gjitha e dinë që Majlinda s’ka fb prandaj lajmi i dhënë prej disa portaleve është jo korrekt dhe për përfitime të ulëta!”, ka shkruar trajneri i xhudos, Kuka.
Tashmë me angazhimin e avokatit Koci, pritet që të ndërmerren hapa adekuat në ndalimin e këtyre postimeve nga persona të paautorizuar./tg
