BORXHET E SHUMTA – VETËVRITET BABAI I DY FËMIJËVE

0
41

Varfëria dhe borxhet e shumta kanë çuar drejt vetëflijimit një 40-vjeçar në fshatin Çipan në rrethin e Devollit. Ngjarja e rëndë ndodhi në orët e para të mëngjesit të së shtunës, në banesën e viktimës. Sipas policisë lokale, viktima i identifikuar Zarif Cici, babai i dy fëmijëve është gjetur i pajetë rreth orës 07:00 të mëngjesit nga familjarët e tij.

Policia tha se viktima është gjetur i vetëvarur me një litar në fyt nga bashkëshortja dhe fëmijët, në kasollen e bagëtive. Burime nga grupi hetimor në vendngjarje thanë se zanafilla e ngjarjes ishte një ditë më parë, kur viktima kishte diskutuar ashpër mbrëmjen e së premtes me bashkëshorten e tij, për borxhet e shumta që kishin dhe pamundësinë për të siguruar bukën e gojës për fëmijët. 40-vjeçari ishte njeri i rregullt, por varfëria ekstreme dhe borxhet e shumta për të siguruar bukën e përditshme për fëmijët e tij, nuk e lejonin atë të bënte një jetë normale. Sipas burimeve tona, pas debatit, i cili ishte rikthyer prej kohësh në një rutinë të përditshme në këtë familje, viktima është larguar për t’u kthyer në orët e para të mëngjesit dhe për të kryer aktin fatal, transmeton BW.

Sipas policisë, familjarët në momentin e ngjarjes nuk ndodheshin në banesë, pasi kishin çuar bagëtinë në kullotë dhe teksa kanë hyrë në ambientet e brendshme të banesës janë përballur me mungesën e kryefamiljarit dhe menjëherë kanë nisur kërkimet. Të alarmuar, menjëherë kanë njoftuar edhe policinë lokale, ndërsa janë përpjekur t’i japin viktimës edhe ndihmën e parë. Sipas dëshmive të fqinjëve, familja Cici jetonte në varfëri ekstreme dhe me borxhe të shumta. Referuar atyre viktima ishte i papunë dhe prej kohësh kishte nisur të grindej me bashkëshorten e tij, ndërsa ndihej i pafuqishëm për të përballuar jetesën. Sakaq, pas këqyrjes së kufomës është arritur në konkluzionin se nuk ka shenja dhune dhe se kemi të bëjmë me një vetëvrasje.kohaislame